KALEO тобы Алматыда өнер көрсетеді
Шоу 29 қарашада «Халық Аренада» өтеді
Исландияның рок тобы KALEO 29 қарашада концерт қояды. Бұл шоу топтың Қазақстандағы бірінші концерті болмақ.
Бәнд 27 қарашада Ташкентте де өнер көрсетеді.
KALEO деген кімдер?
KALEO — Исландиядан шыққан ең танымал рок топтардың бірі. Онда бес адам өнер көрсетіп жүр:
Иекүл Юлиуссон — вокал, гитара;
Рубин Поллок — соло гитара;
Даниел Кристианссон — бас гитара;
Давид Антонссон — барабандар;
Торлейвюр Гаукюр Давидссон — гармоника, клавишті аспаптар.
Олар блюз рок, инди фолк және альтернатив рокты араластыратын ерекше стилінің арқасында танылған. Жұртқа көбіне олардың Way Down We Go әні белгілі. Бұл трек кезінде Peaky Blinders, Lucifer, Grey's Anatomy, Suits сияқты сериалдарда қолданылып, әлем хитіне айналды. Осы уақытқа дейін төрт студио альбомы шықты: Kaleo (2013), A/B (2016), Surface Sounds (2021), Mixed Emotions (2025).
Концерт қайда өтеді?
Топтың ресми сайтына сенсек, концерт «Халық Аренада» өтеді. Билеттер Ticketon-нан сатылып жатыр. Ең арзан билеттің бағасы — 20 мың теңге, ал ең қымбаты 80 мың теңге тұрады.
